Tirimba Ogoti

Rora emeremo Jalada Africa bakorire

Bwango iga Abariki korwa Jalada ‘mbatemete kobeka amo amariko y’emenwa aoao ya Abaabrika (buna Egeswaeri, Ekegusii, Egeacholi, Ekegere, Ekemeru, Ekeigbo n’Egezulu) na konyebasiria gochia Ekenyamorero n’emenwa ende aoao.

image

Nche tintigweti maega, nabo natemete ngaisaransa nse na koriika omogano korende tongogeti igo nkaboria abaaregani korwa ekeombe kia Jalada mbanyobeka ase ewebsite yabo.

Ngatema rende gotonga agapoem akeng’e igo akwo narogete “Obobisi bw’ense ya Igoro”.
Amariko ayio onsi aoao nigaa agotoka, koranyore ribaga nyasome bwegokie, naende emegano meke nero oranyare gotegerera: http:// jalada.org/

(Ebicha: Korwa ewebsaiti ya Jalada.org)

ABAANCHWA BANE CHIOMBE N’ECHINGOKO: ENSEMO ENTANG’ANI

Rhinoceros_Beetle

(Ebicha: Africapoint.com)

Tata inaki agaanchete obotugi abwo kare? Nonya bono naanchete emeremo eyio. Egento narorire egekong’u gotuga nechiombe. Ntwagatugire chiombe kare riri twamenyete aria Molo. Bono omwaka o 1992 Abatwomera igoro (ko abande bakobaroka Abasigisi) bagachaka esegi eyio ekabetereria tong’anye korwa aroro. Engaki esegi yaogete ning’iyorete abasacha bakoeinda nechinsara gochia korwania ababisa. Engaki eyio amaiso ane konyora tarang’ainia igo tinamaete ninki kiarenge kogenderera, tinamaete Omotwomera igoro ninki, gose Omomaanyi gose Omoikoyo.

Ning’inyorete gingotara getii nakogenda ase chiombe chiakabekire esike, namanya koumora amache ime y’echingoro chiria chiremire n’amatimbo ime y’echabu eria. Bono egento nachete komanya neke; oise kobeka omorengari oo ase engoro y’eritimbo indigosoka, rikoirana ime. Korende oise gosuka ensemo iga ritimbo rikorora oborabu na gosoka. Amatimbo ayio arenge aria amanene amasomba-esike, aria abwate egento mosio bwe rigunchara ri’ekeobiria s’omotwe. Abamura baminto nabarabwo imbagatugire amaruma amo n’ebisusu.

Korwa engaki eyio twatamete esegi aria Molo emiaka ang’e ekomi ne’ene egaeta abaibori bane bataratuga chiombe naende. Bono ng’ora ng’ora tata agachaka gotuga ebichuchu. Nabo abianchete ekerage nonya chingaki chinde obireta nyomba na kobisiekera nonya ebabu ime, biatioki enyomba nagotorentera chinda. Tata agatema gotuga ching’ondi chikamanya koibu (erabe na Abamaanyi) nakonyenyerwa ang’e na seito. Abaibi abwo bakaimoki enyama na gototigera amayio, eura n’amanyinga oka.

Tata akamanya korangeri omogaka gete omonyamesira, omogaka okong’ire, naende korwa egesaku ki’Abakamba.

Nkarora omonyamesira oyio gagosiba amariogo gete ase risakara na konyabisa ase akabaga gake gesieri abwo boeri. Timanyeti gose eriogo erio ndiabwatete abaibi abwo.

Ng’ora ng’ora tata agachaka gotuga chiombe naende. Akagora chiombe isato. Ibere nyang’era eyemo nyabarati iga. Eng’ombe eyemo nyang’era ekamanya kobwatwa noborwaire gete. Egeka geke gekaera egasinyu koimoka, egachaka gosoki amasombogoku korwa monwa, na koruta chintacho rituko rigima. Mama akamanya goteba, “Oroche buna ekoruta chintacho na gosoki riuro? Nonya abanto nabo bagokwa iga.” Naende teireti egeka egetambe rituko erioerio egakwa. Abaamanyi bagacha bakanyeira gochia gotindeka. Rituko rikobwatia  tata akagora chimbori. Mama agakona ko tatebeti tata kende.

Eng’ombe eyemo neroo yatigarete. Tata agantomire inyesibe getii, omanya kong’inyori kera engaki,

“osibe egekundo buya tegenda o bande tochake kogamba ebina igaa.”

Eng’ombe eye neero nabo yaanchete kobasoka, yaaminchoria gochia are. Bono ko egotamboka epara chingaki chinyinge yamochia gotachu nechipigipigi n’echirori. Omweri oye egaacha ekagota nagosinyu gotenena yoka. Twakarangeiri abagaka gete batobwatesi twanyeimoki. Egaika engaki gete tata akarosa, akarangeri abanyenyi banyegore. Nkaigwa ng’a naichana ngatama tindora rikongo riaito rikoirwa konyenyu.

Engaki y’etoigo

1936 (ebicha: Obokoreri Bw’ogokonya bwa Marietta Pennsylvania)

Omokubio oeta naigwete buna tindi. Engaki eyio nario embura yabwatete ‘nse na gotonya ogotonya, ekagera chigari koratera para bokia. Engaki eyio nario narenge koinyora omosubati ominto, oyio osirete engaki buna eyio omwaka o 2008. Emiaka eye yonsi amaiga atusunyoire bori. Omosubati ominto nyagosira Caroline Bitutu arenge omwasioku buya, omosubati orenge n’amanyinga y’abanto.

Rimo ning’inyorete nanyorete risakara eero rigoteba ng’a Bitutu oochereirwe na abanto gete. Risakara erio rigateba ‘nga goika ebese eakanu bamanye komoa obosibore. Bono ko nasoma risakara riria ingasoa goichana na korigia kera ase, ko i’mpara, ko i’mogondo, ko narari. Timonyoreti. Omoerio oye nario Bitutu akoirana korwa ase aebisete na gontebi ng’a n’egosori  yarenge.

Bono osirire misi. Chibicha chiae chionsi, gotatiga eyemo, chiarusigwe korwa s’enyasi. Inkai ‘ndamorigi imonyore? Tari bosa bagoteba ng’a “Makweri namaganga, akonya koira kwomo ‘ng’a nyomba mbaichora. Ning’o bono orakwane erandi? Erandi yatigara igo.”

(28th March 1979 – 11th May 2008)

Obosera bw’okorika

hawthorne-sophia

Nabaareganiri ase eblogi yane. Eye nero epost yane entang’ani. Nche buna intongire nabo nde omwesuri ekerage, n’abanto abange bantebirie bo. Igo bono inkore ki? Gote abanto nabo batuure ching’encho aoao.

Egento ‘ng’anchete mono n’okorika na koira chingaki korengereria ase egeka egetambe igoro yamang’ana aoao. Korwa engaki narenge esukuru y’oboroso goika bono nabeire ginkorika ase ebitabu ebisinini igoro yamang’ana nabeire gingokora na korora kera ewiki. Ang’e emiaka kianda ne’etato nabeire ginkorika amang’ana amange.

Koreng’ana nomosaikolojisti oyomo, Ira Progoff, okorika amang’ana ebiro gogokonya omonto koerora eng’encho are ase oboime. Naende riri omonto akorika igoro y’obogima bwaye akogenderera gagokina kebongo na konyora obosemia obonge igoro yo’obomwanyabwanto bwae.

Bo igo, okorika nabo gogokonya omonto goutoka nakoeigwa buna chigurube chindito chiri abwaate chiagusuire. Obwo nabwo obosera bwo’okorika.

(ebicha: Amang’ana ebiro a Sophia Peabody Hawthorne (1809–1871), 1862)

Post Navigation